Fundarsköp stjórnar

Starfsreglur og fundarsköp stjórnar knattspyrnudeildar Breiðabliks árið 2011

1. Skipan stjórnar

1.1. Stjórn deildarinnar skipa sjö manns. Fjórir sem kosnir eru á aðalfundi auk formanna mfl. ráðs karla, mfl. ráðs kvenna og unglingaráðs. Tveir varamenn eru í stjórn og eru þeir kosnir á aðalfundi.

1.2. Verkaskipting milli stjórnarmanna er sem hér segir:
1.2.1. Formaður, kosinn sérstaklega á aðalfundi.
1.2.2. Varaformaður. Varaformaður skal leysa formann af í forföllum hans, nema að annað sé ákveðið sérstaklega.
1.2.3. Ritari.
1.2.4. Gjaldkeri.
1.3. Varamenn taka sæti aðalmanna í stjórn í forföllum stjórnarmanna.
1.4. Stjórnin skipar framkvæmdastjórn. Í henni eiga sæti formaður, gjaldkeri og framkvæmdastjóri deildarinnar sjá lið 4.1.1.



2. Hlutverk stjórnar knattspyrnudeildar Breiðabliks er eftirfarandi:

2.1. Að hafa yfirstjórn allrar knattspyrnuiðkunar hjá Breiðabliki Ungmennafélagi milli aðalfunda deildarinnar.
2.2. Að framkvæma ályktanir aðalfundar.
2.3. Að vinna að eflingu knattspyrnu hjá Breiðabliki.
2.4. Að annast erlend samskipti.
2.5. Að bera fjárhagslega ábyrgð á rekstri deildarinnar gagnvart aðalstjórn Breiðabliks.
2.6. Að líta eftir því að lögum og reglugerðum KSÍ og Íþrótta- og Ólympíusambands Íslands sé fylgt.
2.7. Að sjá um öll samskipti við aðalstjórn félagsins á vettfangi knattspyrnu.
2.8. Að úthluta þeim styrkjum til knattspyrnu sem deildin fær til umráða.
2.9. Önnur verkefni sem ákveðin eru.

3. Boðun og stjórnun funda
3.1. Fund í stjórn deildarinnar skal halda einu sinni í mánuði að jafnaði, eða þegar þörf krefur.
3.2. Formaður deildarinnar boðar stjórnarfundi og stýrir þeim. Formanni er heimilt að fela framkvæmdastjóra boðun funda.
3.3. Stjórn deildarinnar skal setja sér fastan fundartíma.
3.4. Fund stjórnar skal boða að lágmarki með a.m.k. þriggja sólarhringja fyrirvara og skal dagskrá liggja þá fyrir. Í fundarboði skal tíma- og staðsetning fundar nefnd.
3.5. Aukafundi stjórnar skal boða með a.m.k. tveggja sólarhringja fyrirvara og skal dagskrá liggja þá fyrir. Í fundarboði skal tími og staðsetning fundar nefnd.
3.6. Framkvæmdastjóri skal, að höfðu samráði við formann, undirbúa drög að dagskrá stjórnarfundar með hæfilegum fyrirvara.
3.7. Varastjórnarmaður skal boðaður á stjórnarfundi með sama hætti og hefur hann seturétt, málfrelsi og tillögurétt á stjórnarfundum.
3.8. Stjórnarfundur er löglegur ef fjórir eða fleiri stjórnarmenn sitja fundinn. Einstakir stjórnarmenn geta verið í símasambandi við aðra stjórnarmenn. Ákvörðun er lögleg ef meirihluti viðstaddra stjórnarmanna er málinu samþykkur.
3.9. Tveir eða fleiri stjórnarmenn geta óskað eftir stjórnarfundi og skal þá til hans boðað eins fljótt og auðið er.
3.10. Heimilt er að taka mál til umræðu á fundi þó að það hafi ekki verið kynnt í dagskrá, enda sé meirihluti stjórnarmanna sammála því.
3.11. Stjórn og formaður geta boðið einstaklingum á fund þegar þörf er á.
3.12. Fundargerðir stjórnar skal senda stjórnarmönnum, aðalstjórn Breiðabliks og/eða birta með öðrum aðgengilegum hætti sem fyrst eftir að þær hafa verið samþykktar í stjórn.



4. Ákvarðanir milli reglulegra funda
4.1. Framkvæmdastjórn tekur ákvörðun milli funda. Mál sem eru afgreidd af framkvæmdastjórn skulu tekin upp til formlegrar afgreiðslu á næsta fundi aðalstjórnar deildarinnar.
4.1.1. Í slíkum tilvikum skal formaður, eða framkvæmdastjóri í hans umboði, kynna málið fyrir stjórnarmönnum, eða varamanni í forföllum aðalmanna, og leita álits þeirra.
4.1.2. Einnig er hægt að leita álits stjórnar á einstökum málum með tölvupósti eða myndsendingu.
4.1.3. Ákvarðanir símafundar, þar sem meirihluti stjórnar er í símasambandi, skal leggja fyrir næsta formlega stjórnarfund, skv. 3. gr.
4.2. Niðurstöður afgreiðslna funda framkvæmdastjórnar skulu kynntar sem ákvörðun hennar sé um að ræða.

5. Fjármál og rekstur
5.1. Reikningsár deildarinnar skal vera almanaksárið.
5.2. Gjaldkeri ber ábyrgð á öllum fjármálum, rekstri deildarinnar og gerð fjárhagsáætlunar gagnvart stjórn deildarinnar. Hann skal kynna stöðu fjármála deildarinnar fyrir stjórn með reglulegu millibili. Taka skal mið af verklagsreglum aðalstjórnar Breiðabliks.
5.3. Ritari ritar fundargerðir stjórnar og hefur yfirumsjón með ritstjórn ársrits deildarinnar í samráði við framkvæmdastjóra. Ritari er formaður vefráðs og hefur yfirumsjón með vefsíðu knattspyrnudeildar í samráði við framkvæmdastjóra. Ritari hefur yfirumsjón með vef deildarinnar í Felix-vefkerfinu.
5.4. Framkvæmdastjóri fer með prókúru deildarinnar í umboði stjórnar. Í forföllum framkvæmdastjóra fara gjaldkeri og formaður með prókúru.
5.5. Unglingaráð hefur sérstakan gjaldkera og fer framkvæmdastjóri deildarinnar með prókúru unglingaráðs.
5.6. Formaður, gjaldkeri og framkvæmdastjóri geta hver um sig undirritað skuldbindingar fyrir hönd knattspyrnudeildarinnar með fyrirvara um endanlegt samþykki stjórnar séu skuldbindingar innan ramma fjárhagsáætlunar. Skuldbindingar vegna útgjalda sem eru umfram fjárhagsáætlun þarfnast samþykki á stjórnarfundi, skv. 3. gr.
5.7. Nefnd, vinnuhóp eða ráði innan deildarinnar er ekki heimilt að skuldbinda deildina fjárhagslega nema með samþykki framkvæmdastjórnar.
5.8. Framkvæmdastjóra er heimilt að ráða annað starfsfólk til starfa með samþykki stjórnar. Framkvæmdastjóri er æðsti yfirmaður starfsliðs knattspyrnudeildarinnar.

6. Skipting verkefna innan stjórnar
6.1 Stjórn knattspyrnudeildar Breiðabliks er heimilt að skipta eftirtöldum málaflokkum milli einstakra stjórnarmanna, ráða eða útdeilda þeim til annarra:
6.1.1 Erlend samskipti.
6.1.2 Fjárhags- og markaðsmál.
6.1.3 Fræðslumál.
6.1.4 Lagamál.
6.1.5 Mótamál.
6.1.6 Skráning afreka.
6.1.7 Tæknimál.
6.1.8 Unglingamál.
6.1.9 Útbreiðslumál.
6.1.10 Öldungamál.
6.1.11 Önnur verkefni sem upp koma hverju sinni.
6.2 Stjórnarmenn sem fara með umsjón einstakra málaflokka skulu sinna þeim milli stjórnarfunda og undirbúa erindi sem til deildarinnar koma fyrir næsta fund stjórnar.
6.3 Mál sem berast deildinni og tilheyra ofangreindum flokkum skulu að jafnaði fara fyrst til meðferðar hjá þeim vinnuhópum og/eða einstaklingum sem fara með ofangreind mál og síðar lögð fyrir stjórn til afgreiðslu eða meðferðar.
6.4 Upplýsingar um framgang mála og verkefna sem eru til vinnslu hjá einstökum vinnuhópum stjórnar eða ráðum skulu sendar öðrum stjórnarmönnum til kynningar milli stjórnarfunda.


7 Nefndir og ráð knattspyrnudeildar Breiðablik
7.1 Stjórn deildarinnar skipar í eftirfarandi ráð: Meistaraflokksráð karla, meistaraflokksráð kvenna og unglingaráð.
7.2 Ráð deildarinnar eru skipuð frá 1. nóvember ár hvert til eins árs.
7.3 Meistaraflokksráð karla og meistaraflokksráð kvenna hafa ekki heimild til fjárútláta né fjárskuldbyndinga.
7.4 Unglingaráð ber að leggja fyrir stjórn deildarinnar fjárhagsáætlun hvers árs til samþykktar. Um aðra starfsemi unglingaráðs ber að fara eftir 5 grein þessara reglna.
7.5 Stjórn deildarinnar er heimilt að skipa nefndir til að sinna þeim málum sem getið er í lögum eða talin eru upp í grein 6 hér að ofan.
7.6 Þá er stjórn deildarinnar heimilt að skipa nefndir eftir því sem þörf er á hverju sinni.
7.7 Starfstími nefnda eða vinnuhópa innan deildarinnar skal aldrei vera lengur en fram að næsta aðalfundi deildarinnar, nema að annað sé kveðið á um í lögum Breiðabliks.
7.8 Við skipun nefndar skal tilgreina verkefni, verksvið, starfstíma og undir hvaða vinnuhóp stjórnar nefndin heyri, sé ekki kveðið á um það með öðrum hætti.
7.9 Stjórnarmenn og framkvæmdastjóri deildarinnar skulu hafa seturétt með málfrelsi í nefndum sem stjórn deildarinnar skipar.


8 Annað
8.1 Öll umræða sem á sér stað á stjórnarfundum deildarinnar skal fara með sem trúnaðarmál nema annað sé fram tekið.
8.2 Birta skal reglurnar fyrir öllum stjórnar- og varastjórnarmönnum, nefndarmönnum og starfsliði deildarinnar. Þær skulu einnig birtar á heimasíðu deildarinnar
8.3 Reglur þessar taka þegar gildi og gilda til loka starfstímabils stjórnarinnar.


Samþykkt á fundi stjórnar 9. mars 2011.